Бізде қант 350 теңгеден сатылып жатыр – Құмар Ақсақалов

Фото: pixabay.com

Солтүстік Қазақстан облысының әкімі Құмар Ақсақалов қант бағасын 350 теңге деңгейінде ұстап отырғанын мәлімдеді, деп хабарлайды Sputnik Қазақстан.

Жыл басында облыстың тұрақтандыру қорына шамамен 800 тонна қант сатып алынған болатын. Жақында тағы 460 тонна жеткізілді.

«350 теңгенің қантын көбінесе қаладағы сөрелерде сатып отырдық. Күнделікті сұраныс 3 тонна болып тұр. Енді Көксу мен Тараздағы екі зауыттан тағы қант сатып алдық, бірақ сәл қымбатқа түсті. Жаңылмасам, 430-450 теңгенің маңайында. Дегенмен біз бірінші партиясын 350 теңгеден саттық, осы бағаны әлі де ұстап отырмыз», — деді Ақсақалов орталық коммуникациялар қызметінде өткен брифингте.

Әкімнің сөзіне қарағанда, күндердің күнінде 350 теңгенің қанты таусылады.

«Әрине, біз үй жанындағы дүкендерде қант бағасын 15 проценттен асырмауды бақылап отырамыз. Ол үшін мониторинг топтары үнемі тексеріс жүргізіп отырады. Тәртіп бұзушылықтар болса, тиісті шара қабылдайды», — деп түйіндеді Ақсақалов.

Оқи отырыңыз: