Ақпарат және қоғамдық даму министрлігі жанындағы «Қазақстандық қоғамдық даму институты» басқарма төрағасы Нұрбек Матжани қазақстандықтардың «азаматтық некеге» көзқарасы қандай екенін айтты, деп хабарлайды Sputnik Қазақстан.
Институт «Қазақстандық отбасылар – 2022» ұлттық баяндамасын дайындау аясында өңірлерде әлеуметтік сауалнама жүргізген. Сауалнама барысында қоғамның тіркелмеген некеге қалай қарайтыны да зерделенген.
«Орташа алғанда барлық жастағы адамдардың шамамен 25%-і «азаматтық некеге» оң көзқараспен және 30%-тен астамы бейтарап қарайды. Яғни Қазақстандағы әрбір бесінші неке тіркелмеуі мүмкін. Ал қолдамайтындардың үлесі – 32,8 процент», — деді Матжани орталық коммуникациялар қызметінде өткен баспасөз мәслихатында.
Сондай-ақ бала тууды жоспарлау бойынша да сауалнама жүргізілді.
Матжанидің айтуынша, сауалнамаға қатысқан қазақстандықтардың 73,5%-і бала тууды жоспарлау қажет деп санайды. 15,2 пайызы жоспарлаудың қажеті жоқ деп есептесе, 11,3%-і бұл сұраққа жауап бере алмаған.
