Енді қазақстандық студенттер үйден шықпай-ақ оқу орнын ауыстыра алады

63
Фото pixabay.com сайтынан алынды

«Электронды үкімет» порталында студенттерге арналған жаңа қызмет пайда болды. Оның көмегімен колледж, училище және кәсіби дайындық оқу орталықтарының студенттері басқа оқу орнына ауысуға және қайта қабылдауға өтініш бере алады, деп хабарлайды Sputnik Қазақстан.

Онлайн өтініш беру үшін eGov.kz порталында «Білім» бөліміне кіріп, «Білім алушыларды білім беру ұйымдарының үлгілері бойынша ауыстыру және қайта қабылдау» қызметін таңдау қажет. Содан кейін барлық жолақты толтыру керек, деп мәлімдеді «Ұлттық ақпараттық технологиялар» АҚ баспасөз қызметі.

Кейде «Ұлттық білім беру деректер базасы» ақпараттық жүйесінде жоқ құжаттар порталда көрінбеуі мүмкін. Ондай жағдайда қолданушы мәліметтерді өздігінен енгізе алады.

Егер студент шетелдік білім беру ұйымынан ауысса, оған төмендегі құжаттардың сканерленген көшірмесін қоса жіберу керек:

  • меңгерілген оқу бағдарламалары туралы құжат;
  • Қазақстан Республикасында нострификациялау рәсімінен өтетін білім берудің алдыңғы деңгейін аяқтағаны туралы құжат;
  • шетелдік білім беру ұйымдарына түсу кезіндегі түсу сынақтарының нәтижелері.

Қаржылық қиындыққа байланысты оқуға қайта қабылданған жағдайда, студент оқу ақысын төлегені туралы түбіртектің сканерленген көшірмесін қоса ұсынуы тиіс.

Сұрау сәтті өңделген жағдайда, қолданушының жеке кабинетіне ауысқаны немесе қайта қабылданғаны, не болмаса құжаттарын қабылдаудан бас тартқаны туралы хабарлама келеді.

Оқи отырыңыз:

Біздің әлеуметтік желілердегі аккаунттарымызға жазылыңыз:

Telegram, Instagram, Twitter, Facebook 

Сондай-ақ біздің Facebook –тегі тобымызға қосылыңыз