Павлодарда 17 жасар қыз антисептиктен уланып көз жұмды

Фото pixabay.com сайтынан алынды

Павлодарда уланған үш қыздың біреуі көз жұмды, деп жазады Sputnik Қазақстан.

Оқиға қиын жағдайға тап болған балаларды қолдау орталығында болған. Бұл туралы Sputnik Қазақстанға Павлодар облысы денсаулық сақтау басқармасының баспасөз хатшысы Эльмира Темірғалиева хабарлады.

17 жастағы қыз 2 қаңтар күні сағат 18.30-да жедел жәрдеммен ауруханаға жеткізілді. Оған белгісіз затқа улану, ми ісінуі диагнозы қойылды. Интенсивті терапия жасалды. Алайда кешкі сегізде қыздың жүрегі тоқтап қалды. Жарты сағат бойы реанимациялық шаралар жасалды, бірақ еш нәтиже бермеді.

«Дәл осы күні сағат 21.40-та облыстық балалар ауруханасына дәл осы орталықтан тағы екі қыз түсті. Екеуі де 2004 жылы туған. Улану диагнозы қойылды, олар 14 қаңтарда ауруханадан шығарылды», — делінген ақпаратта.

Қыздардың айтуынша, 1 қаңтар күні кешкі 20.30-да үшеуі 2,5 стакан «Антисептик — МД-1» мен су араластырып ішкен. Түн тыныш өтті. Алайда таңертең құсқысы келген. Медицина қызметкерлері мен тәрбиешілер жағдайдан бейхабар болды.

Тәртіп сақшылары болжамдарының біріне сәйкес, олар өз-өзіне қол салуға әрекет жасаған.

Облыстық полиция департаменті баспасөз қызметінің ақпараты бойынша қылмыстық кодекстің 105-бабы («өз-өзіне қол салуға итермелеу») және 371-бабына («салғырттық») сәйкес, сотқа дейінгі тергеу басталды.

Бірінші баппен кінәлі деп танылғандар үш жылдан сегіз жылға дейін бас бостандығынан айырылады. Екінші бап бойынша 4 мың айлық есептік көрсеткішке дейін (11 668 000 теңге) айыппұл қарастырылған. Сондай-ақ, 4 жылға дейін сотталуы мүмкін.

Айта кетсек, бұған дейін бұл оқиға жайлы облыстық ресми органдары жариялаған жоқ.

Оқи отырыңыз: