Шымкентте полиция жарапазан айтып жүрген 14 баланы анықтап, олардың ата-анасын тәртіпке шақырды деп хабарлайды Ulysmedia.kz.
Шымкент қалалық полиция департаментінің ювеналды полиция қызметкерлері кәмелетке толмағандар арасындағы және оларға қарсы жасалатын құқықбұзушылықтардың алдын алу мақсатында «Түнгі қаладағы балалар» профилактикалық іс-шарасын жүргізіп жатқанын мәлімдеуде.
Нәтижесінде, қала аумағында жүргізілген рейд барысында 44 әкімшілік құқықбұзушылық тіркелген. Атап айтқанда, жарамазан айтып жүрген 14 жасөспірім, түнгі уақытта ойын-сауық орындарында болған екі жасөспірім, заңды өкілінсіз тұрғын үйден тыс жерлерде болған 27 бала анықталған.
Сондай-ақ, кәмелетке толмағандардың ойын-сауық орындарында болуына жол берген бір мекемеге қатысты әкімшілік хаттама толтырылған. Аталған жайт бойынша, шымкенттік тәртіп сақшылары, түнгі уақытта мектеп оқушыларының қадағалаусыз жүруінің алдын алу мақсатында Шымкент қаласының білім басқармасына ұсыныс жолданып, балалар мен ата-аналар арасында түсіндірме жұмыстары жүргізілгенін жеткізуде.
«Біз мұндай профилактикалық іс-шараларды үнемі жүргізіп отырамыз. Ондағы мақсат – қала тұрғындарының қауіпсіздігі мен тыныштығын қамтамасыз етіп, қылмыстық жайттарды болдырмау және оның алдын алу. Осы тұста, құрметті азаматтар заң бәрімізге ортақ екенін ескертемін. Өз балаларыңыздың тәртібі мен қауіпсіздігі үшін жауапты екендеріңізді назарда ұстаңыздар», – дейді Шымкент қаласы полиция департаментінің бастығы Қайрат Дәлбеков.
Оқи отырыңыз:
- Қазақстанда негізгі тауарлардың бағасы 20-25 процентке қымбаттады
- «Менің тілекшілерім»: Абысындарын көрсеткен Жазира Байырбековаға ел тәнті болды (фото)
- Жеке куәлікте аты-жөнді қазақша жаздыру үшін не істеу керек
